Congressman Siao as Co-Author of the Freedom of Information Bill

FOI edited

Cong. Siao, co-author sa FOI Bill

Gi-uyunan ni Iligan City Lone District Cong. Frederick W. Siao ang pagpagawas ni Presidente Rody Duterte og executive order nga adunay kalabutan sa Freedom Of Information Bill.

Kini maoy hinungdan nga iyaha gilayong gidawat ang pag co-author sa usa sa mga version sa nasangpit nga balaodnon nga giduso ngadto sa kongreso.

“Tugma mani sa atong gusto nga pang-gobyerno, sihag o transparent. Gusto nato nga mahibalo ang katawhan kung unsay mga panghitabo sa matag buhatan sa gobyerno nga aduna silay kalambigitan,” miingon si Siao.

Ang FOI usa ka balaodnon nga naghatag og katungod sa publiko nga maka-access og mga impormasyon nga aduna silay kalambigitan. Gimandoan nga mo-obserba niini nga balaod ang tanang ahensiya sa gobyerno, mga government-owned and controlled corporations (GOCCs), mga state universities and colleges ug mga local government units (LGUs).

Ang mga impormasyon nga mahimong makuha sa publiko nga giingon sa maong balaodnon naglakip sa mga official o mga public records, mga dokumento, transcripts, mga hulagway, films, mga sound and video recording, electronic data on official acts, mga transaksiyon, mga desisyon ug mga research data.

Apan ‘exempted’ o dili lakip sa FOI ang mga dokumento nga nakalatid ang seguridad sa nasud o usa ka dapit, public safety, diplomacy, individual privacy, intellectual property ug mga business property rights ug privileged communication sama sa lawyer-client ug doctor-patient communications.

“Apan walay FOI request nga i-deny aron lang mo-cover up sa usa ka kremin o kaha sa graft and corruption,” dugang sa kongresista. Apan gikinahanglan niini ang ‘formal request’ nga dili sukwahi sa balaod ug sa ‘rules and regulations’.

Gipasabot ni Siao nga libre ang pag-request sa mga impormasyon nga gikinahanglan sa usa ka buhatan apan mahimong bayaran ang pagpakopya sa mga gipangayo nga dokumento.*

PRESS RELEASE (August 8, 2016)
Office of Cong. Frederick W. Siao
Reference: Verne Padilla
Head,BMPC

Leave a Reply